Ka më shumë se dy muaj që kur është formuar Qeveria e re e Kosovës e udhëhequr nga Avdullah Hoti.

Por, ky i fundit ende nuk ka emëruar një zëdhënës, shkruan arbresh.info.

E kjo po konsiderohet shqetësuese edhe nga Asociacioni i Gazetarëve të Kosovës. Në një përgjigje për arbresh.info, AGK ka thënë se kjo pozitë rrit transparencën e këtij institucioni.

“Asociacioni i Gazetarëve të Kosovës konsideron se Zëdhënësi i Qeverisë si pozitë publike ka një rëndësi të veçantë, e cila rritë transparencën e këtij institucioni, por që njëkohësisht lehtëson punën e gazetarëve.   Bordi i AGK-së, u ka rekomanduar qeverive të mëparshme për të emëruar zëdhënës për të qenë sa më transparent jo vetëm ndaj gazetarëve, por edhe ndaj qytetarëve”, thuhet në përgjigje.

Por, në drejtim të AGK-së nuk kanë shkuar ankesa për këtë mungesë.

“AGK-ja nuk ka pranuar ankesa nga gazetarët për mungesën e një zëdhënësi të Qeverisë Hoti, por konsiderojmë se duhet të ketë dhe emërimi i saj/tij të bëhet sa më shpejt që të jetë e mundur”, thuhet më tej në përgjigjen e AGK-së.

Portali arbresh.info ka rreth një javë që ka dërguar pyetje në drejtim të zyrës për medie brenda Qeverisë së Kosovës se kur do të bëhet emërimi i zëdhënësit, por që nuk ka marrë përgjigje.

Praktikë të ngjashme me vonesë në emërimin e zëdhënësit kishte pasur edhe ish-qeveria e Kosovës e udhëhequr nga Albin Kurti.

Ai kishte emëruar Përparim Kryeziun në këtë pozitë pasi kishin kaluar rreth dy muaj nga formimi i Qeverisë./arbresh.info/